LAOAG CITY – Nagsinnapgod ti motorsiklo ken kurong-kurong iti Barangay Santa Maria ditoy siudad ti Laoag.
Segun ken ni Patrolman James Dulay, Duty Investigator ti Laoag City Police Station – Traffic Division, ti driver ti motorsiklo ket agtawen ti 21 ken residente iti Barangay Nambaran iti ili ti Bacarra idinto a ti nangiturong ti kurong-kurong ket agtawen ti 38 ken residente iti Barangay San Juan iti ili ti Pasuquin.
Inbatadna a basar iti inwayatda nga imbestigasion, kabayatan a dumaldalyasat ti nakamotorsiklo nga agturong nga agpa-abagatan ket kellaat a nagU-turn ti nangiturong ti kurong-kurong nga agturong met iti kapada a direksion a nangitunda ti panagsinnapgod dagiti dua a lugan.
Inlawlawagna nga agpada a nagsagaba ti sugat dagiti dua a driver a naitaray iti Gov. Roque B. Ablan Sr. Memorial Hospital.
Kunana a nakaruaren iti ospital ti driver ti kurong-kurong idinto a nagtalinaed pay laeng iti balay-pagagasan ti nangiturong ti motorsiklo para iti naan-anay a pannakatamingna.
Mainaig iti daytoy, inpakaammo ni Patrolman Dulay a manamnama a dumalan iti operasion ti driver ti motorsiklo gapu ta naapektaran ti spinal cord daytoy.
Kabayatanna, awan pay ti panagsarita ti agsinnungbangir a partido maipanggep iti napasamak a desgrasia.
