LAOAG CITY – Nagsinnapgud ti maysa a motorsiklo ken pick-up iti Barangay 3 iti ili ti San Nicolas.
Napasamak ti disgrasia kabayatan ti panagdudupudop dagiti tattao ken nairot a taray ti trapiko, maysa nga aldaw sakbay ti bisperas ti baro a tawen.
Basar iti San Nicolas Municipal Police Station, kabayatan a dumaldalyasat ti nakamotorsiklo nga agturong nga agpa-laud ket kellaat daytoy a nagsardeng a nangitunda ti panagsinnapgudda ti sumarsaruno a pick-up nga agturong met iti kapada a direksion.
Gapu iti daytoy, nagsagaba ti sugat iti nagduduma a paset ti dua a driver ken insigida dagitoy a naitaray iti kaasitgan nga ospital para iti naan-anay a pannakatamingda.
Naammoan nga immuna a nagresponde iti nakapasamakan ti insidente ket dagiti kameng ti Sarrat Municipal Police Station kalpasan a nairana a dimmalyasat dagitoy iti nasao a lugar.
Iti agdama, awan pay ti pinal a panagsinnarita dagiti dua nga agsinnungbangir a partido gapu ta manarimaan pay laeng ti panagpaimbagda iti ospital.
