LAOAG CITY – Agtultuloy ti imbestigasyon dagiti kameng ti PNP Piddig kalpasan ti aksidente iti national highway a sakop ti Brgy. Calluza iti ili ti Piddig.
Nabigbig dagiti karaman iti aksidente da Prince Lord Valencia y Alejandro, adda iti umno nga edad, salesman iti maysa a depot, driver ti motorsiklo ken residente iti Brgy. Barcelona iti ili ti Solsona.
Ti driver ti tricycle ket ni Royland Pascua y Salvador, agtawen ti 48, naasawaan, construction worker ken residente iti Brgy 14, Calambeg, iti ili ti Piddig.
Iti imbestigasyon ti PNP Piddig, bayat nga agpapaamyanan ti motorsiklo ket maipagarup nga immagaw iti bangir a linya ken nakadinnungpar na ti tricycle.
Gapu iti daytoy, ni Valencia ket nagsagaba ti sugat iti sumagmamano a paset ti bagi na rason a naitaray iti ospital idinto a saan a naan-ano ni Pascua ngem adda iti impluwensya ti nasanger.
Dagiti dua a lugan ket nagtalinaed da iti kustudyar ti PNP Piddig agraman ti driver a nakainom.
