LAOAG CITY – Dead on the spot ti driver ti motorsiklo kalpasan ti napasamak a desgrasia iti national highway a sakupen ti Brgy. Salugan iti ili ti Currimao.
Basar iti Philippine National Police iti nasao nga ili, nabigbig ti driver ti motorsiklo a Yamaha Sporty nga agmaris ti orange ken nangisit a ni Julio Tapat y Caluya Jr., agtawen ti 41, addaan ti live in partner ken residente ti Brgy. Poblacion 1 ken nabigbig met ti kinalubbonna a ni Cherry Ann Obidus y Gabiana, agtawen ti 19, awanan asawa ken residente ti Brgy. San Simeon iti nasao nga ili.
Segun iti imbestigasion, nabigbig ti driver ti Isuzu Forward Aluminum Van a ni Daniel Brix Lagran y Castillo, agtawen ti 24, awanan asawa ken residente ti Brgy. 39, Pasiocan iti ili ti Bacarra idinto a nabigbig met dagiti kakaduana nga helpers nga isuda Harvey Reglos y Acasio, agtawen ti 23, awanan asawa ken Sherwin Burigsay y Teppang, agtawen ti 25 nga agpada a residente dagitoy ti Brgy. 3, San Andres II iti ili ti Bacarra.
Nadakamat iti police blotter a nabigbig met ti driver ti maysa pay a motorsiklo a Kawasaki Rouser 180 a nairamraman iti desgrasia a ni Virgilito Julian y Bahande, agtawen ti 28 kaduana ti live-in partner daytoy a kinalubonna a ni Mary Ann Obidus y Gabian, agtawen ti 25 nga agpada a residente ti Brgy. San Simeon iti ili ti Currimao.
Mainaig iti daytoy, basar iti naisayangkat nga imbestigasion, kabayatan a dumaldalyasat ti nangiturong ti motorsiklo a Yamaha Sporty nga agturong nga agpa-abagatan ket idi makadanon iti kurbaan a paset ti kalsada ket im-overtake iti SUV a saanna a naripar nga adda met ti sumungsungad a Van a nangitunda ti panagdinnungparda agingga a nagdinnungparda pay iti maysa met a motorsiklo a Kawasaki Rouser 180 no sadino natnag ti kinalubbon daytoy.
Gapu iti daytoy, naideklara a dead on the spot ti driver ti Yamaha Sporty babaen ken ni Dr. Addilou Fidelfio ti Municipal Health Office iti ili ti Currimao kalpasan a nagsagaba ti nakana a sugat iti ulo ken sumagmamano a paset ti bagina no sadino awan ti lisensiana ket saan a nakasuot ti helmet idi mapasamak ti desgrasia.
Kabayatanna, naammoan a dagiti dadduma a biktima ti desgrasia ket agpapada a naitaray iti Mariano Marcos Memorial Hospital and Medical Center iti siudad ti Batac a manarimaan pay laeng ti pannakataming dagitoy.
