LAOAG CITY – Inpetteng ni Mr. Arthur Valente, ti Fishery Regulatory Officer iti Dept. of Agriculture ditoy probinsya a nalagda dagiti ramramit a pagkalap nga inted ti BFAR-Regional Office iti Barangay Davila iti ili ti Pasuquin.
Daytoy ket kontra iti rakurak ni Barangay Chairman Elviro Agoo iti nasao a barangay nga alisto a madadael dagitoy ken ti bilog a naited ket fiber glass ken nalag-an daytoy rason nga ad-adda a delikado isut gapo na a saan nga usaren dagiti mangalap.
Segun kenni Valente, pammati laeng dagiti mangalap iti nasao a barangay nga alisto a paerdi dagiti naipaay a pagkalap gapo ta saan da pay nga inpadas nga inusar.
Inbatad na a ti naited a fiber glass a bilog ket masapol laeng a mamentenar ti pinta na saan a kas kadagiti dati a maus-usar.
Inlawlawag na a saan a ti porma wenno langa ti masapol a maikkan ti importansya ti maysa a bangka a pagkalap no diket ti panagtapaw na, kalagda ken kapaot daytoy a mausar.
Kinarit pay ni Valente dagiti mangalap a padasen da a maswen ti nasao a bangka tapno mapaneknekan a naibker dagiti ramramit a naited kadakuada.
Maipalagip a maipagarop a saan a kayat nga usaren dagiti mangalap dagiti inted ti BFAR gapo ta patyen da a mas delikado ken saan a naidesenyo para iti adalem a paset ti baybay.
