LAOAG CITY – Napalaos ti panagyaman ni Mr. Herdy Yumul, maysa a sociologist ditoy Ilocos Norte iti pannakaisubli ti bag na a naglaon ti dakkel a kantidad ken nagduduma nga ID’s.
Binigbig ni Yumul ti nangisubli ti bag na a ni Mr. Ernesto Basilio, agtawen ti 28 ken residente iti Barangay 28 ditoy ciudad ti Laoag.
Segun kenni Yumul, napan iti INCAT idi nabati na iti nagluganan na a tricycle ti bag na nga ayan ti wallet a naglaon ti nasuro 30 a ribo a pisos a pagpaswedo na kuma kadagiti agartarimaan ti balay da.
Inbatad na nga idi nadlaw na a mapukpukaw ti bag na ket saan a nagdanag gapo ta patyen na a maisubli daytoy.
Kunana a basar iti palawag ni Basilio ket nakigtot idi nakita na ti linaon ti bag rason a nagpakuyog iti pastor da ken binirok da isuna tapno maisubli ti bag.
Inlawlawag na a gapo ta makumikom iti trabaho na ket innala na laeng ti cellphone number ni Basilio ngem mapalabas ti sumagmamano a lawas ket saan dan a makontak ti driver ken saan a pulos a dimmawat ti gunguna.
Naamoan a saan a daytoy ti ummuna a gundaway a nagisubli ti bag ni Basilio ken nalawag ti rakurak ti driver a saan na a tagikwaen ti saan na a kukua.
Innayon ni Yumul a saan na kuman nga irakurak ti pasamak ngem gapo ta masapol a maikkan ti pammibig ni Basilio ket plano na pay ti agsurat iti gobierno ditoy ciudad ti Laoag tapno mapadayawan ti kinapudno ti nasao a tricycle driver.
