LAOAG CITY – Inpetteng ni Mr. Jerry Carreon nga awan ti kinapudno na a napatawan daytoy ti preventive suspension kas principal ti Ilocos Norte National High School.
Segun kenni Carreon, naiyakar laeng isuna iti Ilocos Norte College of Arts and Trade (INCAT) iti sumagmamano a bulan ken ti principal iti daytoy ket isu ti mapan iti Ilocos Norte National High School.
Inlawlawag na a ti nasao nga addang ket tapno saan na a maipluwensyaan ti maiyuswat nga imbestigasyon seknan iti maipagarop a panagkolektar ti membership fee ti Parents-Teachers Association.
Nupay kasta, inlawlawag na a saan nga isuna a mismo ti agkolkolektar ken daytoy ket ti pay laeng panagkolektar ti 150 a pisos kadagiti nagannak a nangrugi idi 2019.
Inbatad na a no malpas ti imbestigasyon ket agsubli met laeng isuna kas principal ti Ilocos Norte National High School.
Mainaig iti daytoy, kinumpirmaran met ni Mrs. Cherry Joy Garma, ti Legal Designate iti Dept. of Education – Laoag City nga awan ti naipataw a preventive suspension kenni Mr. Carreon no diket basar iti re-assignment order manipud iti Regonal Director ken isu ti inpatungpal ti Division Office idi kalman, Nobyembre 14.
Innayon na a daytoy ket manaig pay laeng administrative case kontra kenni Carreon ngem saanen a nangipaay ti naan-anay a detalye gapo ta manarimaan ti pannakatratar na daytoy.
