LAOAG CITY – Paset ti agtultuloy a pannaka-harass ken pannakabutbuteng ti team Fariñas babaen iti kalaban a partido ti pannakabakal-bakal dagiti behikulo a maus-usar iti panagkampanya.
Daytoy ti patien ni Mr. Melvin Dela Cuesta, dati a city councilor ditoy siudad ti Laoag ken agpaidasig a bokal iti primero distrito ditoy probinsya kalpasan a maysa ti lugan kadagiti nabakal-bakal babaen kadagiti saan pay a nabigbig nga inbidibidual.
Kuna na a karaman ditoy ti barker ti Team Fariñas nga adda iti pagtaenganda.
Segun ken ni Dela Cuesta, rumuar koman iti pagtaenganda iti Brgy. 5 iti ili ti Sarrat tapno agkampanya.
Nu pay kasta, inbatad na nga idi mapan iti luganna a nakaparking iti sango ti pagtaenganda ket naklaat da iti asawa na gapu ta nabubuong ti sarming iti likod daytoy.
Kuna na a posible a dadakkel a bato ti naibakal gapu ta tallo a dadakkel nga abot ti naibati a perdisyon iti sarming ti luganna.
Inbatad na a malaksid iti pannakabakal-bakal ti lugan ket nairaman pay a naperdi dagiti nakaipaskil a campaign materials.
Mainaig iti daytoy, kuna na a ti barker ti Team Fariñas a nakaparking iti likod ti pagtaenganda ket karaman a nabakal-bakal ken nadadael met ti sarming na.
Immunan nga inpakaammo ni Dela Cuesta a basar iti asawa ken dagiti karubba da ket adda ti nangngegan da a nanalbaag iti parbangon.
Mangnamnama ni Dela Cuesta a maimbestigaran ti nasao a pasamak tapno maamoan ti adda iti likudan daytoy.
Nagpanawagan ti kandidato a maitalna ti aniaman a plano iti pannaka-harass ken mapagtalinaed ti nalinak ken natlna nga eleksyon.
