LAOAG CITY – Naglikudan ni Mr. Oscar Gagala Jr., residente iti Barangay 14, San Gregorio iti ili ti San Nicolas, ngem agdama nga agnanaed iti isla ti Hawaii ti alegasyon kenkuana ni Brgy. Chairman Norberto D. Dadiz Sr. iti Barangay 15 iti nasao nga ili.
Daytoy ket mainaig iti maipagarop a nabayag a panangiparking ni Gagala iti lugan na iti sango ti barangay hall ken pinagsasawan na ti agkakadakes a sarita ti kapitan.
Inpasingked ni Gagala nga awan ti kinapudno na ti alegasyon gapu ta nalawag a binaliktad na ti napasamak.
Inyistorya ni Gagala a naggapo iti firing range iti ili ti Paoay ngem gapu ta napigsa ti tudo ket inparking na ti lugan na iti igid ti balayda iti sango ti barangay hall.
Kuna na a kabayatan ti panagdigus na ket napan ti kapitan ken maipagarop a pinagsasawan na ti kabsatna a babai ken ti bayaw na gapu iti nakaparking a lugan na.
Inpetteng ni Gagala nga idi mapanna alaen ti lugan na ket ditoy metten a pinagsasawan ti kapitan, ngem saanna pulos a sinungbatan ti madi.
Inpasingked ni Gagala nga adda ti dua a konsehal a nakaimatang ken nakangngeg iti panagsarita da ken dagitoy ti makaibaga no siasinno kadakuada iti kapitan ti agsasao ti pudno wenno agul-ulbud.
Innayon na nga idi makita na nga arigna ma-high blood ti kapitan ket inyadayo na lattan ti lugan na ken sipud idi ket saandan a nagkita pay agingga a nagsubli daytoy iti isla ti Hawaii.
Inpaganetget ni Gagala nga amin dagiti insawsawang ni Kapitan Dadiz ket paspasig nga inuulbud ken binaliktad na ti napasamak.
