LAOAG CITY – Inlawlawag ni Mr. Silvestre Ramos iti Barangay Davila iti ili ti Pasuquin no apay nga inbaot na ti sagad iti maysa a baro.
Segun kenni Ramos, adda ti kubo-kubo a pagtatambayan dagiti babaro ken asideg laeng iti pagturturogan da nga agasawa isut gapo na a maistorbo da.
Inbatad na a kanayon da met a bagbagaan dagitoy a no lumabas da ket saan da a natagari nangruna no orasen ti panaginana da nga agasawa ken saan da nga iparit a magna dagitoy.
Nupay kasta, kuna ni Ramos nga ulit-uliten met latta dagiti maseknan ti ar-aramiden da.
Kunana a kalpasan daytoy ket inpakaammo na kenni Barangay Chairman Elviro Agoo ken adda ti inbaon ti opisyal a mangkita iti daytoy ngem agingga ita ket saan a nagsardeng dagiti babbaro.
Inpetteng na a rinabii pay nga aggi-inom dagiti babbaro iti kubo-kubo ken paburburen da dagiti motorsiklo da uray tumingnga iti rabiin.
Malaksid iti daytoy, maipagarop a pagsawsaw-an ken dildilatan ti baro ti baket na a ni Lucia isut gapo na a napunwan.
Gapo iti daytoy, idi nakita da nga agasawa a limmabas ti baro a nakabisikleta ket kinurwayan ti baket ti darat ngem idi napan naiparking ti maseknan ti bisikleta na ket nagsubli iti sango ti balay da Ramos.
Kunana nga idi nagsubli ti baro ket maipagarop a pinagsawsaw-an ken intudo-tudo na ti baket ken idi umasideg isuna ket adda manen ti sao ti baro isut gapo na a nakapungtot ken nasakit ti nakem na.
Kabayatanna, inbatad ni Barangay Chairman Elviro Agoo iti Barangay Davila a masansan a trataren da iti barangay ti panagbalin a bayolente dagiti agasawa no adda ti lumabas iti balay da partikular iti Sitio 3, Cabacaraan.
Segun kenni Agoo, kukua dagiti agasawa a Silvestre ken Lucia a kukua da ti lote ken kalikagom da nga aladan da daytoy.
Nupay kasta, kuna ni Agoo a kinasarita na dagiti agasawa ken inbaga na a saan da a mabalin nga aladan gapo ta isu laeng ti pagnaan dagiti kalugaran na.
Inbatad na a madlaw ti lakay no adda ti lumabas iti nasao a paset ti lugar ket mabalin a maistorbo ti turog da isut gapo na a makapungtot dagitoy.
Naamoan a kagura met dagiti ubbing ti ar-aramiden dagiti agasawa a Ramos isut gapo na a mapan da met salangaden dagitoy.
Inbaga na a kanayon da met a ronrondaan ti nasao a paset ti lugar.
Innayon na nga inpasa nan iti biang ti PNP iti nasao nga ili tapno isuda ti mangtratar iti daytoy a pasamak gapo ta kanayun nga isu ti trattrataren da.
