LAOAG CITY – Sinungbatan ni Ms. Glenda Almo, mangidadaulo ti Laoag City Public Market and Commercial Complex ti alegasyon ti maipagarop a pannakai-require kadagiti farm to market vendors a mangala ti lisensya da kas distributor.
Segun kenni Almo, dagiti farm to market vendors ket saan a maipalubos nga aglako iti merkado publiko iti inaldaw.
Inpetteng na a maipalubos laeng daytoy no night market iti Miyerkules ken Domingo iti kada lawas.
Inlawlawag na nga adda dagiti dadduma nga aglaklako a pilosopo gapo ta ipetteng dagitoy a farm to market vendors dagitoy iti laksid nga ammo dan nga ado ti lako da.
Kunana a dagiti farm to market vendors ket dagiti agilako kadagiti produkto a binuras na iti arubayan da.
Inbatad na a dagitoy a klase ti vendors ti nasken a mangala ti ticket ngem no makita a bulto ti lako dagitoy ket masapol a mangala ti lisensya da.
Kabayatanna, ginutigot na dagitoy a no adda man ti problema ken adda ti kalikagom da a malawlawagan ket agturong da laeng iti opisina na.
