LAOAG CITY – Inpeksa ni Ms. Shyra Harris iti ili ti Pasuquin ti panakadismaya na iti maysa a panganan iti Brgy. 1 iti ili ti San Nicolas.
Daytoy ket kalpasan a maipagarup a nabiktima iti food poisoning ti kabsat na a napan nangan iti nasao a restaurant.
Segun ken ni Harris, Hulyo 4 idi napan ti kabsat na ken dagiti kadua na iti trabaho iti ili ti San Nicolas.
Nu pay kasta, kuna na a basar iti palawag ti kabsat na, parbangon ti Hulyo 5 ket nagtakki ti kabsat na agingga iti bigat a nakarikna iti panagkapsot.
Gapu iti daytoy, dagus a nagresponde iti pagtaengan da ken naipan ti kabsat na iti Bacarra Medical Center iti ili ti Bacarra.
Kuna ni Harris nga apaman a nakadanon da iti hospital ken nailawlawag kadagiti nurse ti sitwasyon ti kabsat na ket dita a naamoan da nga ado pay ti sabali a naka-confine a napan met laeng iti nasao a restaurant ken nangan dagitoy ti seafood.
Inbatad na a basar iti konsultasyon ti doktor ket food poison ti naduktalan a napasaran daytoy.
Mainaig iti daytoy, inpakaammo ni Harris nga inpost na iti facebook ti sitwasyon ti kabsat na ken nadakamat na ti nagan ti restaurant.
Inbatad na a gapu iti daytoy ket nangipatulod ti mensahe ti page ti restaurant ken arig a konkondenaren dagitoy ti panagpost na iti facebook.
Kabayatanna, kuna ni Harris a basar iti nakisarsarita kenkuana a management ti restaurant ket nagkari da a tumulong ngem kagudwa laeng dagiti nagasto ti maited ken banag a saan na a maawat.
Nu pay kasta, kuinbatad ni Harris nga apaman a nakapagdesisyon ti kabsat na nga awaten lattan ti tulong ket rumrumuar nga apaman a nagsasarita da idi kalman kadua da ti agtagikua ti restaurant ket arig a napangtaan a maisaklang gapu iti nagbalin a post na iti facebook a dagus met laeng a pinugas na.
Inbunannag ni Harris nga awan ti plano na a mangisaklang iti restaurant ngem nu isaklang ti agtagikua gapu iti pangipost na ti facebook ket ituloy da ti kaso.
Iti agdama ket naka blotter ti restaurant iti PNP.
Naamoan a malaksid iti kabsat ni Harris ket adda ti tallo a dadduma pay a mangkonkondenar ken dumadawat ti tulong manipod iti maseknan a restaurant.
