LAOAG CITY – Awan ti pammilin manipod iti lokal a gobierno iti ili ti San Nicolas kadagiti daycare workers nga agkolektar ti kontribusyon tapno matuloy ti koronasyon wenno ti “Popularity Contest”.
Daytoy ti inpaganetget ni Mr. Dennis Villa, ti mangidadualo iti Municipal Social Welfare and Development Office iti ili ti San Nicolas.
Inbatad ni Villa nga immunan nga inbilin na kadagiti daycare workers a no saan da a kabaelan ti makaukkon ti 40 a ribo a pisos tapno matuloy ti koronasyon ket saanda nga ipilit.
Inpetteng ni Villa a saan nga inkapilitan ti panagbayad dagiti nagannak para iti nasao nga okasyon no di ket no ania laeng ti kabaelan nga ipaay.
Namonganay ti nagbalin a palawag ni Villa kalpasan nga adda ti nagkamang iti Bombo Radyo Laoag gapu ti maipagarop a panag-contribute ti maysa a daycare worker iti sag-sangaribo a pisos ti kada nagannak.
