LAOAG CITY – Manamnama a maipila ti kaso a robbery ita nga aldaw kontra kadagiti dua a suspek kalpasan a sinerrekda ti Municipal Social Welfare and Development Office iti lokal a gobierno iti ili ti Badoc.
Segun ken ni Police Captain Edison Pasamonte, ti Hepe iti Philippine National Police iti nasao nga ili, apaman nga adda ti naawatda nga impormasion nga adda ti mapukpukaw a maysa a printer ken maysa a laptop ket dagusda a nangiwayat ti imbestigasion maipapan iti nasao nga insidente.
Inbatadna a basar iti naala ti Close Circuit Television Camera a nakaimuntar iti asideg ti nadakamat a pangopisinaan ket naduktalanda a dagiti suspek ket maysa a menor de edad nga agtawen ti 17 ken agtawen ti 20 nga agpada dagitoy a residente iti ili ti Badoc.
Gapu iti daytoy, inpalgakna a saanen a makalibak dagiti suspek iti inaramidda a krimen gapu kadagiti nadagsen nga ebidensia kontra kadakuada.
Innayonna nga inadmitir met laeng dagiti suspek nga isuda ti adda iti likudan ti napasamak nga insidente kagiddan ti panangibagada iti nangikabilanda dagiti tinakawda a banag no sadino narekobre met laeng dagitoy.
