LAOAG CITY – Dakkel ti nagbalin nga epekto ti napasaran a napigsa a tudo iti nagduduma a paset ti probinsya kangrunaan na kadagiti mula a bawang.
Segun kenni Mr. Joner Salvador iti ili ti San Nicolas, saan da a ninamnama ti nagbalinan dagiti mula na a bawang gapo ta napunno ti danom iti nagmulaan na.
Inbatad na a malaksid kenkuana ket masayangan met dagiti pada na a nagmula gapo ta arig na ket nagbalinen a karayan ti nagmulaan da ti bawang.
Kunana a dagiti mula da a bawang ti pangnamnamaan da ngem gapo iti napasamak ket awanen ti namnama a masalbar pay dagiti bawang.
Nupay kasta, kunana nga obserbaren da pay iti tallo agingga iti lima nga aldaw dagiti mula da a bawang kalpasan ti panagtudo na.
Mainaig iti daytoy, agarop dua nga ektarya ti namulaan ti bawang iti ili ti San Nicolas manipud iti dati a 100 nga ektarya.
Daytoy ket gapo iti panagamak dagiti dadduma a miembro iti San Nicolas Bawang Association nga agmula gapo iti agdama a sitwasyon kangrunaan na iti klima.
