LAOAG CITY – Naamendaran dagiti maipataw a pannusa kontra kadagiti aglabsing kadagiti naipatungpal a pagalagadan iti baet ti COVID-19 pandemic ditoy probinsya.
Daytoy ket kalpasan nga inaprobaran ti Sangguniang Panlalawigan ti gakat iti maikatlo ken maudi a pannakaibasa na.
Segun kenni Sangguniang Panlalawigan Member DaVinci Crisostomo, chairman ti committee on laws, mamulta iti 1,000 a pisos dagiti aglabsing para iti first offense, 2,000 a pisos iti second offense ken 5,000 a pisos ti third offense.
Inlawlawag na a dagiti matiliw a saan a nakabayad ti multa ket mabalin a mapatawan ti panagcommunity service iti tallo nga aldaw para iti first offense, innem nga aldaw iti second offense ken 15 nga aldaw iti third offense.
Maiyaplikar dagiti nasao a pannusa kadagiti agsalungasing iti liqour ban, curfew, saan a panagisout ti facemask ken dadduma pay.
Innayon ni Crisostomo a ti pannakaibaba ti multa dagiti pagalagadan ket ad-adda a naiget ti gobyerno probinsyal, ken dagiti enforcers a mangipatungpal kadagiti linteg.
Inpetteng ni Vice Gov. Cecilia Araneta Marcos, a saan a multa ti kalikagum da ngem ketdi iti panagtungpal ti publiko kadagiti pagalagadan.
