LAOAG CITY – Nagsublin ti operasion ti Munich Airport idiay Germany kalpasan a nakita dagiti nagsasaruno a panagtayab dagiti saan pay a naduktalan a drone iti lugar.
Nalukatan manen ti eropuerto iti agarup alas-5 ti bigat kalpasan a masigurado dagiti otoridad a natalged daytoyen manipud iti pangta dagiti nakita nga agtaytayab a drone.
Inbatad ni Danish Prime Minister Mette Frederiksen, iti baet a saan pay a masinunuo dagiti otoridad no asino ti adda iti likudan ti panagpatayab kadagiti drone ket rumrummuar nga adda ti pangta iti Europe a daytoy ket ti Russia.
Naglikudan met daytoy ti Kremlin ken inpettengda nga awan ti pakainaiganda kadagiti insidente ken awan ti linabsingda a linteg iti tangatang ti Estonia.
Mainaig iti daytoy, napasamak ti kapada nga insidente kadagiti sumagmamano nga eropuerto idiay Denmark rason nga inpawil ti pagilian ti amin a panagpatayab ti drone iti tangatangda.
Daytoy ket adda ti pakainaiganna ti ar-aramiden a panagsagsagana ti Denmark para iti summit dagiti lider ti Europa iti Copenhagen ita a lawas a matalantan ti panangpapigsa ti seguridad iti rehion ken ti agtultuloy a suporta iti Ukraine kontra iti Russia.
Maipalagip a nakanselar ti 17 a flights iti agarup alas-10 ti rabii idi Huebes idinto a saan a bumaba iti tallo a ribu a pasahero ti naapektaran ti insidente.
Immuna iti daytoy, 15 ti sumrek a flights ti saan a naka-landing iti Munich Airport ken naiyakar kadagiti kaparanget nga eropuerto.
Kabayatanna, napilitan a nagserra ti Copenhagen ken Oslo airports gapu iti saan pay a masinunuo a drones a nakita iti asideg ti airport ken military airspaces.
Naglikudan met ti Russia nga adda ti pakainaiganda idinto a dagiti Danish authorities ket inrakurakna nga awan ti ebidensia a karaman ti Moscow.
