LAOAG CITY – Naiget a naglikudan amin ni Mrs. Rosario Aguedan, ti Municipal Agriculture Officer iti ili ti Bangui dagiti alegasyon kontra kenkuana.
Umuna ket ti maipagarop a saan na a panagtaltalinaed iti opisina na no di ket adda iti sabali nga opisina nga agtetext wenno agus-usar ti cellphone.
Inbatad na nga awan ti kinapudno na daytoy ken no usaren na man ti cellphone na ket makikokoordinar kadagiti dadduma nga ahensya ti gobierno para iti pannakai-facilitate dagiti ayuda a mapan kadakuada ken dagiti kliyente da a mannalon.
Maikadwa nga alegasyon ken ni Aguedan ket maipagarop a kanayun nga adda iti Social Welfare Office (SWO), ngem kuna ti municipal agriculture officer a no mapmapan man iti nasao nga opisina ket gapu daytoy iti opisyal a transaksyon.
Maikatlo nga alegasyon kontra ken ni Aguedan ket ti maipagarop a saanna a papan panagat-atendar kadagiti taripnong ngem insungbat ti opisyal a saan da basta maka-travel no saan a maaprubaran.
Inbaga na a ti panagtravel da ket irekomendar ti administrator ken HR, no maaprubaran ti travel request ket isunto pay laeng a maisagana ti travel order nga aprubaran ti mayor.
Kuna na nga adon dagiti gundaway a saan a nakaat-atendar kadagiti taripnong aglalo no adda dagiti mairana nga aktibidad da ken napapateg a taripnong a kayat ti mayor nga adda isuna.
Mainaig iti daytoy, inlawlawag ni Aguedan a saan laeng nga iti ili ti Bangui ti saan pay a nakaawat ti tulong pinansyal para dagiti mannalon no di ket adda da pay sabsabali nga ili ditoy probinsya.
Segun kenkuana, ti trabaho da ket ti mangisumitir ti listaan dagiti amin a nakarehistro iti RSBSA iti region, ken ti region ti mangisumitir iti central office ngem saan da nga ammo no kaanu a maawat dagiti mannalon ti maited kadakuada a tulong.
Kabayatanna, inpasingked ni Aguedan nga awan ti kinapudno na ti maysa pay nga alegasyon kontra kenkuana nga adda ti inung-ungtan na a napan nagsaludsud iti opisina na.
Inpetteng na a saan nga agung-unget kadagiti mapan agsaludsud ngem no adda ti aramiden a madi dagiti staff na kadagiti tattao a mapan iti opisina da ket bagbagaan na dagitoy tapno mailinteg ti kamali da.
Patien ni Aguedan nga adda dagiti kastoy a tumataod nga alegasyon kontra kenkuana gapu iti tallo a rason, umuna ket mabalin nga adda dagiti maapas no apay nga isuna ti naipan iti posisyon na, maikadwa ket adda dagiti agkidkiddaw a saanna a mapatgan ken ti maikatlo ket adda dagiti agkalkalikagom idi iti posisyon na.
