LAOAG CITY – Inlawlawag ni Engr. Venoni Coloma, Municipal Engineer iti ili ti San Nicolas a napundoanen ti drainage canal ti San Nicolas Public Market.
Daytoy ket kalpasan nga ag-overflow wenno aglippias ti danum iti kanal iti amianan a paset iti nasao a merkado publiko.
Gapu iti daytoy, inbatadna nga adu dagiti maapektaran a pasdek negosio ken pagtaengan.
Inlawlawagna a nasurok maysa a milyon a pisos ti nailatang a pundo para iti pannakatarimaan ken pannakapasayaat ti drainage canal.
Mainaig iti daytoy, inadmitir ni Mrs. Rowena Guillermo, Market Supervisor ti San Nicolas Public Market nga adu ti agproblema gapu iti panag-overflow ti drainage canal rason a kalikagumda a masolbar daytoy iti kabiitan a panawen.
Kabayatanna, pinadas ti Bombo Radyo Laoag News Team nga alaen ti takder ni Mayor Mike Hernando maipanggep iti nasao a parikot ngem awan isuna iti opisinana.
Nupay kasta, inpasigurado iti opisina ti Mayor nga ipayalistoda ti pannakasolbar ti problema iti tiendaan.
