LAOAG CITY – Inlawlawag ni Engr. Venoni Coloma, Municipal Engineer iti ili ti San Nicolas a ti pundo para iti pannakatarimaan ti kanal iti likud ti merkado publiko ket indonar ni Mr. Rey Rafael, Balikbayan Mayor 2023.
Segun kenkuana, nagkamalida ti nangipundoanda ti para iti nasao a proyekto nga imbes a Nalupta Street ket Hernando Street ti nakailatanganna.
Nupay kasta, inpasiguradona a maiyakar ti pundo iti Nalupta Street tapno maipatungpal met laeng a nasayaat ti proyekto gapu ta ti agdama a kanal ti tarimaanenda ngem apaman a maiyakar ti pundo ket maiyaramidan ti baro a kanal.
Innayon pay ni Coloma a saanda nga insigida a maiyakar ti pundo gapu iti maipatpatungpal nga Election Ban.
Maipalagip a ti nasao a kanal ket problema pay laeng dagiti residente iti napalabas a tawen gapu ta no agtudo ket mapan ti danum iti kanal kadagiti residential areas.
