LAOAG CITY – Inbatad ni Engr. Lloyd Manayan iti Municipal Engineering Office iti ili ti Pasuquin a ti pannakaipaay ti Notice of Violation kadagiti umuli ket kas panangsurot ti naiyataday iti Building Code of the Philiipines.
Kuna ni Manayan a nailanad a kasapulan ti building permit sakbay a maaramid ti maysa nga imprastraktura wenno pagtaengan.
Inbatad na a manipod idi nagtugaw kas building official iti ili ti Pasuquin ket ado dagiti naobserbaranna nga agipatakder lattan ti balay nu pay awan ti nailakad a builDing permit isut gapu na naipaayan dagitoy ti notice of violation.
Inabaga na a dagiti laeng saan a maikkan ti notice of violation ket dagiti adda ti inpasdek na a nababbaba ngem 15,000 a pisos ti balor na ken nagusar iti indigenous materials.
Mainaig iti daytoy, inbunannag ni Manayan a sakbay pay a naimposar ti panagala ti building permit ket naipakaamo kadagiti umuli a kasapulan ti kastoy a banag sakbay nga agipatakder ti aniaman a klase ti imprastraktura.
Innayun na nga uray dagiti agpabaliw ti pagtaengan ket kasapulan nga addaan ti building permit.
Inbatad na nga umaboten iti 1,000 a pagtaengan manipod iti 15 a barangay iti ili ti Pasuquin ti naduktalanna nga awanan ti building permit.
Namunganay ti palawag ni Manayan kalpasan nga adu dagiti umuli nga adda ti arungaing na seknan ti panagala ti building permit nu pay idi pay laeng 1970s a naipasdek ti imprastaktura.
