LAOAG CITY – Inlawlawag ni Dr. Alfredo Domingo, ti municipal health officer iti ili ti Paoay ti pannakairaman ti nasao nga ili kadagiti naipan iti babaen ti Modified Enhanced Community Quarantine (MECQ).
Kuna na a daytoy ket basar iti napagtutulagan ti covid-19 task force nga idadauloan ti mayor ken nairekomenda met kenni Governor Matthew Marcos Manotoc.
Inbatad na a daytoy ket gapu ta adda ti kellaat a panagngato ti kaso ti covid-19 kadagiti naglabas nga aldaw.
Inpakaammo na a manipod Hulyo 6 ket arigna nasurok a 10 ti kaso iti kada aldaw.
Immuna iti daytoy, kuna ni Domingo a maysa isuna kadagti nangirekomendar iti mayor ti pannakaipatungpal ti MECQ.
Patien na a babaen iti daytoy, ket naan-anay a makissayan ti kaso ti covid-19 iti ili ti Paoay.
Kabayatanna, inbunannag ni Domingo a ti kangrunaan a rason iti alisto a panagwaras ti virus ket ti pannakapinpinnulapol dagiti agpositibo iti kapamilyada.
