LAOAG CITY – Inadmitir ni Barangay Chairwoman Lina Aguinaldo iti Brgy. Parado iti ili ti Dingras a nadismaya ken nakaunget ni Dr. Rhea Domingo, ti Municipal Health Officer iti nasao nga ili kalpasan a naamoan na a rimwar ti Locally Stranded Individual bayat a naka-home quarantine pay laeng.
Daytoy ket kalpasan nga adda ti dimmanon a report ditoy Bombo Radyo mainaig iti maipagarop a panagruwar ti nasao nga indibidwal iti laksid a saan pay a nalpas ti 14-day quarantine period na.
Segun kenni Aguinaldo, kalpasan a naamoan daytoy ni Health Officer ket pinalagipan ti doktor ti maseknan iti umiso a panansurot kadagiti pagannurutan mainaig iti panag-home quarantine.
Mainaig iti daytoy, kuna ni Aguinaldo a pudno a rimwar ti kabaranggayan da kabayatan a naka-home quarantine ngem naminsan laeng a daras ken saanen a naulit pay.
Inbatad na a nagturong daytoy iti Rural Health Unit tapno iproseso dagiti dokumento wenno requirements a kasapulan na iti panagsubli na idiay Metro Manila.
Inbaga na a dagiti kameng ti Barangay Heath Workers ti napusgan a mangbantay ti pagtaengan na ken napan a mismo dagiti empleado ti RHU a nangkita iti nasao a balay sakbay a napalubusan ti panag-home quarantine na.
Inlawlawag pay ni Aguinaldo a negatibo met ti resulta ti antigen test ti kabaranggayan da ngem dimmalan ti swab test iti maikatlo nga aldaw na iti home quarantine nga awan pay ti resulta na agingga iti agdama.
Innayon ti Kapitana a saan na a masinunuo no apay nga awan pay ti resulta ti swab test ti kabaranggayan da ket itan ti maudi nga aldaw ti panag-home quarantine daytoy.
Immun-una ngem iti daytoy, adda dagiti sumagmamano a residente ti Brgy. Parado ti maamak iti inaramid ti kabaranggayan da a panagruwar bayat a naka-quarantine.
