LAOAG CITY – Mamati ni Dr. Sinamar Ann dela Cruz-Abando ti Municipal Health Officer iti ili ti San Nicolas nga awan ti nagkuranganda apaman a naitaray ti maysa nga ubing iti Rural Health Unit iti naso nga ili.
Daytoy ti nagbalin a sungbat ti mangidadaulo iti nasao a Rural Health Unit kalpasan nga adda ti naawat a reklamo ti Bombo Radyo Laoag a maipagarup a saan a pannakataming ti maysa a pasiente.
Binigbig ni Dr. Abando ti nasao a pasiente nga agtawen ti 2 ken taga Barangay 18 iti ili ti San Nicolas.
Inlawlawagna a ti maseknan a pasiente ket naitaray iti alas onse idi malem kalman no sadino nga inpakaammo ti ina ti pasiente nga aggurigor laeng daytoy.
Kunana nga awan ti nadakamatda a cut-off iti nasao nga indibidual no di ket agur-uray laeng daytoy tapno mapan mangala ti dokumento a pang-admit iti pasiente.
Inpettengna nga apaman a nagsubli ti nurse ket awan metten ti nasao a pasiente ken ti inana.
Inbatadna a no naammoanda dagus nga emergency ti situasion ti pasiente ket inpangpangrunada daytoy.
Innayonna a saanna a masinunuo no ania ti sagsagabaen a sakit ti nasao nga ubing gapu ta saanna met a na-assess daytoy.
Kabayatanna, naammoan nga iti agdama ket manarimaan a matamtaming ti maseknan nga ubing iti Mariano Marcos Memorial Hospital and Medical Center iti siudad ti Batac.
