LAOAG CITY – Kinumpirmaran ni Police Inspector Ralph Dayag, ti chief of police ti PNP-Solsona a nakaawat ti bomb threat ti Office of the Mayor iti nasao nga ili.
Segun kenni Dayag, mismo a ti hotline ti opisina ti Mayor ti nakaawat ti bomb threat babaen ti text message.
Gapo iti daytoy, dagus da a nagturong iti munisipyo tapno i-assess ken pinagbakwit da iti natalged a lugar dagiti empleado ken tattao nga adda iti municipal hall.
Inbatad na a dagus da nga inpakaammo iti Explosive Ordnance Disposal (EOD) team ti INPPO tapno mangiyuswat ti panelling iti maatap nga eksplosibo.
Kunana a basar ti mensahe, adda ti naimula a bomba iti uneg ti munisipyo ken anyaman nga oras ken bumtak.
Mainaig iti daytoy, dagiti kitkitaen ti PNP nga anggulo ket ti umasideg nga eleksyon, mangdadael ti productivity ti opisina ken mabalin pay nga aramid dagiti awan ti maubra na a tattao wenno manglukluko..
Nupay kasta, kunana a nagnegatibo ti resulta ti inspeksyon dagiti maseknan ken maibilang daytoy a bomb scare.
Inpasingked ni Dayag nga awan ti masapol a pagbutngan dagiti residente iti nasao nga ili ken nagpanawagan nga agreport iti PNP no adda ti mapagat-atapan a tattao.
Kabayatanna, manarimaan ti pannakadeterminar ti numero ti cellphone a nausar tapno maamoan no sadinno a lugar ti naggapwan ti bomb threat.
