LAOAG CITY – Kinondenar ni Mr. Ismael Ali, presidente ti Ilocos Norte United Muslim Association ti twin bombing a napasamak idiay Jolo, Sulu idi kalman a nakatayan dagiti nasurok 10 a tattao ken nakasugatan dagiti dadduma pay.
Segun kenni Ali, nasakit ti nakem da gapo ta kabsat da a Muslim ti maipagarop a suicide bomber.
Inlawlawag na pay a mangal-ala laeng ti atensyon dagiti akin-aramid iti dua a serye ti panagbettak idiay Jolo isut gapo na nga agar-aramid da latta ti maikanniwas.
Inbatad na a ti ammo na ket awanen ti mapasamak a dadakkel a gulo idiay Mindanao sipud nabwangay ti Bangsamoro Autonomous Region in Muslim Mindanao (BARMM).
Mainaig iti daytoy, kunana a makipagladingit ti sibubukel a Muslim Community iti pamilya dagiti natay a kameng ti tropa ti gobierno kasta met dagiti sibilyan.
Kunana nga ur-urayen da met ti resulta ti maiyus-uswat nga imbestigasyon seknan iti panagpabettak ken rumbeng a maipaay ti hustisya para kadagiti nagbalin a biktima.
Kabayatanna, pabor ni Ali no maipatungpal manen ti Martial Law idiay Mindanao gapo ta idi indeklara ni Presidente Rodrigo Duterte daytoy ket awan dagiti mapaspasamak a gulo wenno natalna ti nasao a rehiyon.
