LAOAG CITY – Inlawlawag ni Dr. Allan Taylan ti panagusar ti face mask a kangrunaan nga us-usaren da a doktor iti panagoperate ken agserbi a proteksiyon iti bagi ken salun-at.
Kuna na a saan a ciento porsiento a makaprotehir dagiti ordinaryo a face mask malaksid iti aw-awagan da nga N95 mask wenno respirator face mask a maysa nga espesyal a proteksyon.
Inbunannag ni Taylan a ti N95 Mask ti naaprobaran nga usaren a mask tapno saan a maakaran ti agwarwaras a novel corona virus.
Mainaig iti daytoy, saan nga inlinged ni Dr. Taylan nga adda dagiti sumagmamano a tattao nga agus-usar kadagiti eksperimento kas iti matulad da iti internet.
Inbatad na a saan pay a napaneknekan a dagiti mabuybuya da a makaprotehir iti salun-at manipud iti epekto ti nCOV.
Inlawlawag ni Dr. Taylan a sakbay a naiparuk-at ti N95 mask iti merkado ket adu a test ti naiwayat tapno mapaneknekan a makasaripda iti anyaman a virus.
