LAOAG CITY – Narekobre dagiti otoridad ti naabandonar a kayo ti uas ken uratan iti Barangay Poblacion iti ili ti Burgos.
Segun ken ni P/Capt. Jenny Lingan, Hepe ti Burgos Municipal Police Station, nagturong ti kapulisan kaduana dagiti opisial ti barangay, Community Environment and Natural Resources Office iti ili ti Bangui nga indauloan ni Forester Alger Chris Quisan Clavo iti sanikua iti pamilia Go iti nasao a barangay.
Inbatadna nga apaman a nakasangpetda iti lugar, narekobreda dagiti naabandonar a kayo a sumurok-kumurang 15 a pedaso ti uas ken uratan tree.
Inlawlawagna a mapattapatta a 15 agingga iti 17 a sentimetro iti kaakabana idinto a pito a metro iti kaatiddogna.
Malaksid iti daytoy, adda pay ti napukan a sumurok-kumurang a 20 a pedaso ti acacia tree a mapattapatta a 15 agingga iti 50 a sentimetro iti kaakabana idinto a dua agingga iti tallo a kadapan ti kaatiddogna.
Iti agdama, manarimaan ti panangberipikar ti Community Environment and Natural Resources Office iti ili ti Bangui dagiti narekobreda a kaykayo ken naikabil dagitoy iti nasao nga opisina.
