LAOAG CITY – Kinumpirmaran ni Police Capt. Joseph Tayaban, ti chief of police iti ili ti Badoc nga adda ti naestablisar da nga alternatibo a pagnaan dagiti motorista a mamagkamang iti probinsya ti Ilocos Sur ken ditoy probinsya.
Inlawlawag na nga adda ti naawat da nga impormasyon nga adda dagiti naaramid nga alternatibo a dalan isut gapuna a dagus da a nangiwayat ti inspeksyon ket ditoy a naduktalan da nga adda ti naaramid nga alternatibo a dalan iti a mamagkamang iti Sta. Cruz Sur iti Ilocos Sur ken Sta. Cruz Sur ditoy Ilocos Norte.
Segun ti opisyal, saan nga alisto a makita ti dalan gapu ta natambakan ken madlaw a nairanta a naaramid tapno adda ti pagnaan dagiti motorista ken nawaya da a rumuar ken sumrek iti dua a probinsya.
Innayon na nga iti pannakaduktal da ti alternatibo a dalan ket nangikabil da a dagus ti kakadwa da a pulis ken ditoy nga adda ti 12 nga indibidual a natiliw da.
Karaman kadagiti natiliw ket ti 11 a taga Badoc idinto a ti maysa ket taga Sinait, Ilocos Sur.
Segun ken ni Tayaban, dagiti innem a natiliw da ket adda ti ID da ngem dagiti dadduma ket awan ti dokumento ti nagluganan da a motorsiklo isut gapuna a tinicketan da dagitoy idinto a dagiti innem a pakairamanan ti taga Sinait ket unauthorized a rumuar ken sumrek ditoy probinsya.
Gapu iti daytoy, ti taga Sinait ket nagdesisyon nga agsubli iti ili da isut gapuna a dagiti lima a taga Badoc nga unauthorized ket naipan da iti isolation area tapno ma-quarantine da.
Malaksid iti pannakai-quarantine da ket mapilaan da pay ti reklamo a panaglabsing ti Article 151 ti Revised Penal Code ken disobedience gapu iti saan da a panangsurot ti protocols.
Kabayatanna, inbaga ni Tayaban a basar iti imbestigasyon da ket ti alternatibo a dalan ket inaramid dagiti agtrabtrabaho iti Mini dam iti paset ti Ilocos Sur tapno adda ti pagnaan da a mangiserrek kadagiti mausar da a materyales.
