LAOAG CITY – Naarestar dagiti dua a lallaki a nagpammarang a kas ophthalmologist kalpasan nangisayangkat ti Philippine National Police iti ili ti Marcos ti entrapment operation pakairamanan dagiti lehitimo nga ophthalmologist a iti Brgy. Imelda iti nasao nga ili.
Inbatad ni PMaj. Jhonvale Maramag, Chief Police iti Philippine National Police a natakuatan dagitoy ddua nga indibidual nga agsuksukat, mangidiaydiaya ti libre a check up ken aglako ti antsokos para kadagiti residente iti nagduduma a barangay iti nasao nga ili.
Basar ti imbestigasion, iti ili ti Marcos ti nangrugianda iti daytoy a manglukluko kadagiti residente a mangipaay dagitoy ti libre a check up idinto nga ibagada nga adda sakit dagiti mata ken singiren dagiti biktima ti maipagarup P4,000 agingga P5,000.
Segun kenni PMaj. Maramag adda ti kadua dagiti suspek a nakalugan iti blue a vios nga addaan ti baro a model.
Innayonna nga adda ti inpakita dagitoy nga request letter a mangisayangkat ti libre a check-up kadagiti kameng ti barangay nu sadinno ket addaan daytoy ti pirma maysa a doktor idinto a mannarimaan ti panagverifyda iti daytoy.
Nupay kasta, nagpabigbig dagiti suspek a residente iti Cavite ken Caloocan ken addaan ti dua a lawas dagitoyen nga adda ditoy probinsia.
Mainaiag iti daytoy, bayat ti imbestigasion dagiti otoridad ket namin tallo a daras a nangited dagiti suspek ti naganda ngem agsasabali dagitoy ken awan ti naipresentarda nga identifaction card.
Kabayatannna, mapilaan dagiti suspek iti panaglabsing ti Republic Act 8050 wenno Optometry Law ken mannarimaan ti panagkoordinar dagiti otoridad kadagiti nagbalin a biktima dagiti supek tapnu maammuan nu mano ti balor dagiti naala kadakuada.
Nagpalagip ni PMaj. Jhonvale Maramag kadagiti publiko a nu adda dagiti mapagduaduaan a maipapaay a serbiso ket idanon dagitoy iti Philippine National Police wenno ti lokal agobierno tapnu makompirmaran dagitoy.
