LAOAG CITY – Dakkel ti panagbabawi ti maysa a lalaki kalpasan a pinaltugan na ti nobya na iti Barangay 54-B, Camanggaan ditoy ciudad ti Laoag.
Nabigbig ti biktima a ni Raylen Ramilo, agtawen ti 25, balasang, taga Abulon, Batan, Aklan ngem agdama nga agkaskasera iti Barangay 54-B, Camanggaan ditoy ciudad ti Laoag, idinto a ti suspek ket ni Silver Agudong, taga Barangay 18 iti ili ti Sarrat.
Naamoan a napan ti suspek iti kasera ti biktima ken maipagarop naaddaan da ti saan a pinagkinnaawatan bayat ti panaggiinum da kadwa da dagiti sumagmamano a papagayam da a a nagresulta ti panangpaltog ni Agudong ken na Ramilo a nakatamaan ti akin-kannawan a paset ti buksit na.
Naitaray a dagus iti Governor Roque Ablan Senior Memorial Hospital ditoy ciudad ti Laoag ti biktima.
Iti panagresponde dagiti otoridad, natiliw a dagus ti suspek ken narekobre da ti maysa a para ordnance pistol ken 10 a bala ti kalibre 45 a paltog, magazine, passbook, cellphone ken dadduma pay.
Inadmitir ti suspek a naaramid na ti krimen gapu ti nakaro nga imon.
Inbatad na pay nga agprob-problema gapu ta iti pannakapaltog na ti nobya na ket naduktalanen ti asawa na nga addaan daytoy ti kabit.
