LAOAG CITY – Inpetteng ti singer a ni Frances Jane Lorenzo Martinez a pursigido a mangipila ti reklamo kontra ken ni Barangay Chairman Wilfredo Limin iti Barangay Escoda, Marcos, Ilocos Norte.
Daytoy ket mainaig ti panangkallabay ken gandat a panangagek ni Kapitan Limin ken ni Martinez bayat ti panagkankanta na iti maysa a minatayan iti nasao a barangay.
Segun ken ni Martinez, kalpasan ti napasamak ket nagpadespensar dagiti barangay kagawad iti nasao a barangay ngem napan na latta inblotter ti napasamak iti PNP-Marcos.
Inbatad ni Martinez a nagpadespensar ti kapitan ngem saanna nga inawat gapu ta amangan no uliten nanto manen ti inaramid na.
Innayon na nga uray ti anak ti kapitan ket nagpadespensar kenkuana ken kiniddaw na a pakawanen na ti ama na ngem saanna a pinatgan daytoy.
Kuna pay ni Martinez a kiniddaw kenkuana ti anak ti kapitan a pugasen na ti video ti ama na nga in-upload na iti social media ngem saanna nga aramiden.
Kinumpirmaran ni Martinez a nakaro ti bartek ti kapitan idi napasamak ti insidente.
