LAOAG CITY – Inrakurak ni Department of Budget and Management (DBM) Secretary Amenah Pangandaman a mairuaren ita nga aldaw, Hulio 5 ti nabatbati a P27 billion para iti COVID-19 health emergency allowance (HEA) dagiti medical workers.
Ti pannakaiparuk-at ti nasao a pundo ket kalpasan a kiniddaw ti Department of Health (DOH) idi Mayo ti panagisyu ti Special Allotment Release Order and Notice of Cash Allocation nga agbalor ti P27.453 billion para iti panagbayad ti nabatbati a 5,039,926 a saan pay a nabayadan nga health emergency allowances ken 4,283 COVID-19 Sickness ken Death Compensation claims ti eligible healthcare ken non-healthcare workers.
Basar iti sekretario, maawat dagiti healthcare workers inton tawen 2025 dagiti amin a nakapenpen a COVID-19 allowance a pinagtrabahoanda iti kangitingitan ti pandemia.
Kabayatanna, nakaiparuk-aten ti Department of Budget and Management ti pakabuklan a P91.283 billion iti Department of Health para iti Public Health Emergency Benefits and Allowances (PHEBA) a sakupen dagiti benepisio para kadagiti healthcare workers manipud idi 2021 agingga 2023.
