LAOAG CITY – Dakkel ti epekto ti nabayag a pannakaaprobar ti tax revenue ordinance iti ili ti Sarrat.
Daytoy ti inpakaammo ti local chief executive ti nasao nga ili.
Kunana nga idi pay laeng umuna a public hearing maipanggep iti daytoy a banag ket inrakurak na a saan laeng a dagiti gagem ti executive ken legislative body ti mapatgan no diket maipangpangruna ti pagsayaatan iti sibubukel nga ili.
Innayon na a ti pannakaaprobar daytoy ket napateg tapno mapagtalinaed iti panagbalin a second class municipality iti nasao nga ili.
Kunana pay a nu saan paylaeng a maaprobaran daytoy ket awan ti sabali nga agbalin a source of fund iti lokal a gobierno tapno maiyimplementar dagiti nagduduma nga programa a pagsayaatan dagiti umili.
Dakkel ti pammati ti opisyal a ti nabayag a pannakaaprubar ti nasao nga ordinansa ket adda ti maris politika na ken gagem na a dadaelen ti imahe na iti umadanin eleksiyon.
Nupay kasta, namnamaen na nga iti sumarsaruno nga aldaw ket maaprubaran metlaeng daytoy.
