LAOAG CITY – Inpetteng ni Ukrainian President Volodymyr Zelensky a gungundawayan ti Russia iti nabayag a pannakaideliber dagiti armas nga usaren da manipod iti Estados Unidos.
Komento daytoy ni Zelensky kalpasan nga immanugot ti Estados Unidos iti $61-billion package a kaadoan ket military aid a para iti Ukraine.
Inpakaammo ni Zelensky a dagiti dadduma a tulong ket nangrugin a nagsangpet ngem masapol a maiyalisto ti pannakaideliber dagitoy.
Bayat ti panagsarita ni Zelensky ket adda iti abayna ni North Atlantic Treaty Organization (NATO) chief Jens Stoltenberg, no sadinno a kunana a saan pay a naladaw para iti Ukraine tapno agballigi iti laban da kontra iti Russia.
Namonganay ti rakurak ni Zelensky kalpasan nga inreport dagiti otoridad iti Black Sea port of Odesa a ti Russian missile attack ket nakatayan ti uppat a tattao ken nakasugatan ti 32 a sabsabali pay.
