LAOAG CITY – Inbatad ni Ilocos Norte 1st District Congresswoman Ria Fariñas ti sumagmamano nga arungaing dagitI residente ditoy siudad ti laoag.
Kuna ni Fariñas a bayat ti panagbisita na kadagiti nagduduma a barangay ditoy siudad ket ado dagiti agkalikagum a mabakunaan kontra iti covid-19 ngem maipagarup a nabayag ti vaccine roll out.
Mainaig iti daytoy, inbatad na a basar kadagiti maaw-awat na a report mainaig iti vaccine roll out ket maipagarup a saan a masur-surot ti usto a pannakaiyusat ti panagbakuna.
Inpakaammo na a daytoy ket kas iti saan a pannakasurot ti priority list iti panagbakuna ken maipagarup a maiyun-una a mabakunaan dagiti awan iti listaan.
Gapu iti daytoy, kuna ni Fariñas a kas ina iti umuna a distrito ti probinsya ket makumikom iti arungaing dagiti umili.
Inpakaammo na a nakisarita ken ni Dr. Fanny Domingo iti provincial health office seknan iti bakuna ket naamoanna nga adda ti simmangpet a 1,000 doses ti Gamaleya Sputnik V Vaccine idi Hulyo 7.
Kabayatanna, kuna na nga awan pay a pulos ti naiparuk-at ditoy siudad.
Nu pay kasta, mangnamnama ti opisyal a masolusyunan ti arungaing dagiti umili ken mapadur-as ti vaccine roll out ditoy siudad.
Immunan nga inbunannag ni Fariñas a ti panangipaay ti suplay iti bakuna ti gobierno national ket maibasar iti kaalisto a panangiparuk-at dagiti local government units (LGUs) ti covid-19 vaccine.
