LAOAG CITY – Inlawlawag ni Dr. Alan Taylan ti mabalin nga epekto ti kemikal a lead a nailaok kadagiti kandila.
Segun ken ni Taylan, ad-adda a makaapektar iti salun-at ti maysa nga indibidual ti maangot a lead manipod iti kandila nu adda iti napupok a lugar.
Kuna na a daytoy ket kangrunaan nu mabayag ti exposure wenno agingga iti nasurok innem nga oras.
Mainaig iti daytoy, inpakaammo ni Taylan a nu maanglab ti maysa a tao ti lead ket mabalin a maapektaran ti utek wenno panagpanpanunot.
Inbatad na a posible pay daytoy a makaitunda ti cancer gapu ta carcinogenic.
Immuna iti daytoy, inlawlawag ni Taylan a saan nag alisto a madeterminar nu adda ti toxin nga itunda ti lead iti bagi.
Innayun na nga ad-adda a presente dagiti sintomas kadagiti kanayun a makaang-anglab wenno exposed kadagiti addaan ti lead a kandila.
