Kinumpirmaran ni Barangay Chairman Bryan Arellano iti Brgy. Elizabeth iti ili ti Dingras nga adda dagiti agtutupada iti Sitio San Agustin iti barangay da.
Inlawlawag na a saan da a matiliw dagiti maseknan gapu ta adda ti agserserbi a para sipot dagiti agtutupada.
Kuna ni Arellano nga idi bulan ti Enero a namonitor da ti iligal nga aktibidad dagiti natiliw a nagtutupada.
Inbatad na a nalimed ti lugar a nakatiliwan dagiti maseknan.
Segun kenni Arellano, adda pay dagiti nakataray idi nagiwayat ti raid dagiti otoridad gapu ta mapatta-patta a 20 dagiti nakipaset iti panagtutupada.
Kuna na a kalpasan ti radi dagiti otoridad ket narekobre ti maysa a cellphone ken nakita da iti video dagiti sumagmamano a karaman iti iligal nga aktibidad.
Binigbig na da Rey Viloria, Benjie Delos Reyes a residente iti Brgy. Elizabeth ken iti Brgy. Barong ili ti Dingras.
Awanen ti ammo ni Arellano no adda ti sabali a lugar a pagtutupadaan dagiti natiliw.
Maipalagip a natiliw ni Juanito Alferez y Villanueva, agtawen ti 70 ken residente iti Brgy Elizabeth iti nasao nga ili ken nakalibas da Delos Reyes, Viloria, Jay-r Agngarayngay ken John Does.
