LAOAG CITY – Nabigbigen dagiti otoridad ti biktima ti napasamak a desgrasya itay parbangon idiay Barangay 40, Buyon iti ili ti Bacarra, Ilocos Norte.
Binigbig ni Police Inspector Joel Corrales, deputy chief of police ti PNP-Bacarra ti biktima a ni Carlos Jay Galisinao, agtawen ti 19, awanan ti asawa, Grade 12 iti Bacarra National High School ken residente ti Barangay 11, Sta. Filomena iti nasao nga ili.
Nupay kasta, agpapan maisursurat ti damag ket awan pay ti puut ni Galisinao ken agdama nga adda iti Gov. Roque Ablan Sr. Memorial Hospital.
Kunana a nakaro ti sinagaba ti biktima a sugat kangrunaan ti ulo na kalpasan ti desgrasya.
Kunana a basar ti inisyal nga imbestigasyon ket agpaamyanan a direksyon ti biktima iti paset ti nagbetngan ti Bacarra ken Laoag City idi kellaat a naipa-shoulder na ti motorsiklo na rason ti saana na a pannaka-kontrol a rason ti nagbaliktadan na.
Inbatad na a ti biktima ket nakainom ken awan ti suot na a helmet idi napasamak ti insidente.
