LAOAG CITY – Inlungalong ni House Deputy Majority Leader Erwin Tulfo ken dagiti kakadwa na iti ACT-CIS partylist ti nadagdagsen a pannusa ken pannakaibalud ti siasinoman a mangabuso ken mangluko kadagiti overseas Filipino Workers agraman ti pamilya da.
Ti panangipila ni Tulfo ti gakat ket kageddan ti pananglukat manen ti sesyon ti Kongreso.
Basar iti inlungalong da a gakat, saan a kumurang a P10 milion a multa ken 20 a tawen agingga iti tungpal biag a pannakaibalud ti maipataw iti siasinoman a mapaneknekan a nakabasol wenno nangallilaw kadagiti Overseas Filipino Workers.
Inlawlawag ni Tulfo nga iti laksid a mapan iti pamiliada wenno urnongen da ti nagrigatan da a kuarta iti sabali a pagilian ket mapan laeng kadagiti manangallilaw.
Segun ken ni Tulfo, masansan a ma-scam dagiti oversees Filipino Workers iti business investments kas iti networking wenno lending, children’s college plans, ken housing.
