LAOAG CITY – Inlungalong ni House Deputy Minority Leader ken Mamamayang Liberal Party-list Rep. Leila de Lima a mapatawan ti nadagsen a pannusa kas ti uppat a tawen a pannakaibalud dagiti opisial ken empleado ti gobierno nga iligal nga agpabpabaknang.
Nakaipalaon daytoy iti House Bill No. 6626 wenno gakat nga Anti-Illicit Enrichment and Anti-Illicit Transfer Act nga inpila ni De Lima.
Inbatadna a daytoy a gakat ket maysa a wagas tapno mapagsungbat dagiti agar-aramid ti maikanniwas iti paglintegan nga agpapaay iti gobierno a makaliblibas iti kaso a plunder wenno panagkunniber.
Kunana a napateg a mapagbalin a linteg ti gakat tapno masolbar ti nakaro a korapsion iti gobierno kas ti maanomalya a flood control projects.
