LAOAG CITY – Umaboten iti 132 ti bilang dagiti natay a pakairamanan ti uppat a pulis iti nadara a police raid iti paset ti marigrigat a lugar iti Alemão ken Penha ti Rio de Janeiro, Brazil.
Basar kadagiti report, daytoyen ti kadaraan nga operasyon iti pakasaritaan ti ciudad.
Kinumpirmaran met ni Governor Cláudio Castro nga agtultuloy ti pananginspeksyon dagiti forensic expert dagiti naireport a natay ken inpetteng da a kaadoan kadagitoy ket miembro ti sindikato.
Iti met palawag dagiti nakakita iti pasamak ken basar kadagiti naiparuk-at a report ket arigna “giyera” ti nagbalin nga engkwentro dagiti pulis ken dagiti armado a lallaki.
Rumrumuar a nagusar pay kadagiti drone nga addaan ti pagpabettak dagiti miembro ti gang tapno darupen dagiti pulis.
Kinondenar met ti United Nations Humans Rights Office ti operasyon ken kuna da a napalalo ti kigtot da iti kinalawa ti kinadamsak.
Mainaig iti daytoy, inrakurak ni Brazilian President Luiz Inácio Lula da Silva nga uray isuna a mismo ket nakigtot gapu ta saan da a napakaammoan mainaig iti nalawa nga operasyon.
Immunan nga inpakaammo dagiti otoridad a target ti operasyon ti Red Command, maysa a mabigbig a sindikato nga aglaklako ti illegal a droga.
Maipalagip a ti raid ket napasamak sumagmamano nga aldaw sakbay a naiyuswat iti ciudad ti C40 World Mayors Summit ken Earthshot Prize nga atendaran ni Prince William ti United Kingdom.
