LAOAG CITY – Kinumpirmaran ni Police Major Rely Layug, ti mangidadaulo iti Community Relation Office iti Ilocos Norte Police Provincial Office (INPPO) nga adda ti mangus-usar ti nagan ni Provincial Director Police Col. Cesar Pasiwen.
Iti eksklusibo nga interview ti Bombo Radyo Laoag ken ni Layug, inbatad na nga adda dagiti agtawtawag kadagiti mayor ken bise mayor ditoy Ilocos Norte nga agpampammarang a ni PD Pasiwen.
Inbatad na a basar iti agtawtawag kadagiti maseknan nga opisyal, maipagarop nga agpatpatulong ti provincial director nga agbiruk ti inhinyero ken arkitek para iti panagpatakder na ti balay.
Malaksid ti daytoy, maipagarop nga agdawdawat pay ti agpampammarang a PD ti load tapno adda ti pagtawag na.
Saanen a naibaga ni Layug no siasinno dagiti mayor ken bise mayor a natawagan.
Innayon na nga awan pay ti pamal-palatpatan da no siasinno ti mangus-usar ti nagan ni Pasiwen ken marigatan da nga agimbestigar gapu ta agduduma a numero ti us-usaren ti maseknan.
Gapu iti daytoy, inbalakad ni Layug a no adda dagiti agtawtawag nga agpampammarang a ni PD Pasiwen ket saan a basta mamati no di ket nasaysayaat no tawagan a mismo ti provincial director.
