LAOAG CITY – Kinumpirmaran ni Police Major Sheryl Guzman, ti pannakangiwat iti Ilocos Norte Police Provincial Office nga adda ti mangus-usar iti nagan ni Provincial Director Police Col. Frederick Obar tapno agdawat iti nagduduma a banag.
Inbatad ni Guzman a naamoan da nga adda ti timmawag iti maysa nga ospital ditoy ciudad ti Laoag a nagpammarang a ni Police Col. Obar ken agkidkiddaw kadagiti agas.
Malaksid iti ospital ket adda pay ti tinawagan ti saan pay a nabigbig a suspek nga agpapaay iti gobierno probinsyal nga agkidkiddaw met ti gatas usar metlaeng ti nagan ti provincial director.
Nupay kasta, iti panagtawag dagiti natawagan nga indibidual ken ni Provincial Director Obar ket naduktalan da a saan nga isuna ti nagtawag nga agkidkiddaw ti agas ken gatas.
Iti agdama, manarimaan ti panagimbestigar ti cybercrime unit tapno maduktalan da ti mangus-usar ti telepono a nagtawag iti maysa nga ospital ken ti agpapaay iti gobierno probinsyal nga agpampammarang a ni Obar.
Mainaig iti daytoy, nagpanawagan ni Guzman iti publiko a saan a basta agtalek iti siasinno man nga agtawtawag ken agkiddaw ti nagduduma a banag tapno saan a mabiktima kadagiti manangallilaw a tattao.
