LAOAG CITY – Pinasingkedan ni Senate Minority Leader Aquilino Koko Pimentel III a dagiti nagbalin a tignay ni Vice President Sara Duterte ket mangapektar ti pondo iti ahensya.
Segun ken ni Pimentel, masapul ti naun-uneg a desisyon maipapan iti agbalin a pondo ti Office of the Vice President inton tawen 2025, gapu ta patien na a saan a deserve ti opisina ti bise presidente ti dakkel a pondo.
Inmmannamong met ni Deputy Minority Leader Risa Hontiveros a saanen a kasapulan a manayunan ti P733 million budget iti Office of the Vice President.
Ngem nu pay kasta, maipalagip nga inpaganetget ni Sen. Grace Poe a saan kuma nga agbalin a rason dagiti tignay ti Bise Presidente iti maap-aprubara a budget ti opisina na.
Kuna ni Poe a saan met a ti personalidad ti pagibasaran iti budget no di ket no kasano a depensaan ti resource person.
Iti agdama, adda iti salinong ti period of amendments iti Senado ti 2025 General Appropriations Bill.
