LAOAG CITY – Inbatad ni Atty. Bernie Constantino, opisyal ti Integrated Bar of the Philippines – Laoag Chapter a dakkel ti sungbatan ti siasinoman a manganbandonar iti maysa a maladaga.
Segun kenkuana, panaglabsing iti PD 603 wenno ti Child and Youth Welfare Code in relation to RA 7610 wenno ti Anti Child Abuse Law ti panangabandonar iti maysa nga ubing.
Kuna na a mabalin pay a sumango iti kaso a panaglabsing ti Art 276 it Revised Penal cose wenno ti Abandonment of Minor ti nagannak a mapaneknekan a saan a mangipaay ti obligasyon a mangtaripato iti ubing nga agtawen ti pito agpababa.
Mainaig iti daytoy, inpakaammo ni Contanstino a nu ti intensyon ti maysa a nagannak iti pannakaabandonar ti ubing ket tapno mapukaw iti lubong ket sumango iti kaso nga infanticide kas nakailanad iti Article 255 iti Revised Penal Code.
Immuna iti daytoy, inlawlawag ni Constantino a nailanad iti Child and Youth Welfare Code a ti maladaga wenno ubing ket addaan ti karbengan a maiyanak, agbiag, maipaayan ti nasayaat a panagbiag ken maited dagiti kasapulanna.
Kabayatanna, namunganay ti palawag ni Constantino kalpasan nga adda ti kaiapasngay a maladaga a naabandonar ken naibati iti maysa a pagtaengan iti Brgy. 1 ditoy siudad ti Laoag idi parbangon ti Nobiembre 1.
Naduktalan ti ubing nga awanan ti aniaman a kawes ken pagilasinan nu naggapoan daytoy.
Iti agdama ket addan iti nasayaat a kasasaad ti maladaga ken manamnama ti pannakaipadalan na ti swab test tapno masigurado a natalged ti salun-at na.
Kabayatanna, agtultuloy met ti imbestigasyon dagiti kameng ti Philippine National Police (PNP) ditoy siudad ti Laoag tapno maamoan no siasinno ti ina ken napan nangibati ti maladaga iti nasao a lugar.
