LAOAG CITY – Balligi ti naiyuswat a search warrant operation iti maysa a pagtaengan iti Brgy. 18 Estancia, iti ili ti Piddig.
Daytoy ket babaen ti nagtipon a pwersa ti PNP-Piddig, PIU-INPPO ken 1st Provincial Mobile Force Company (PMFC).
Naiyuswat ti nasao nga operasyon kontra ken ni Melchor Balgona, agtawen ti 57, mannalon ken residente iti nasao a barangay.
Segun ken ni PLt. Tolentino Erum, ti hepe ti PNP-Piddig maysa addan maysa a bulan a nasipsiputan ti suspek kalpasan nga adda dagiti report nga agik-ikot ken agpappaputok daytoy ti paltog.
Kuna na a basar iti nailanad iti search warrant nga inparuk-at ni Hon. Nida B. Alejandro, Presiding Judge ti Regional Trial Court, Branch 12 ditoy siudad ti Laoag, mabirok iti pagtaengan ni Balgona ti dua a shotgun, maysa a calibre 45 a paltog, maysa a carbine ken maysa a garand.
Nu pay kasta, saan a nabirokan dagiti otoridad ti garand ngem balligi a nakumpiskar ti calibre 45 a paltog, dua a gauge 12 shotgun, maysa a cal. 30 carbine pakairamanan ti nagduduma a bala ti cal. 24, 9mm, cal. 5.56, cal. 30 ken cal. 40.
Kabayatanna, kuna ti suspek a ni Balgona a plano na nga ilakad ti lisensya dagiti paltog na.
Inpetteng na a dagiti paltog nga ikot na ket naisalda laeng kenkuana ken saanna nga us-usaren.
Inbatad na a ti shotgun ket insalda ti maysa a barangay kagawad ken ti calibre 45 ken insalda ti kaanakan na.
Nu pay kasta, agtultuloy ti imbestigasyon ti otoridad mainaig iti panagikot ni Balgona ti nagduduma nga armas.
Manamnama a mapilaan ti kaso a panaglabsing ti RA 10591 wenno ti illegal possesion of firearms ti suspek.
Kabayatanna, naamoan a dati a miembro ti CAFGU ni Balgona manipod 1988 agingga tawen 1996.
