LAOAG CITY – Inbatad ni Mrs. Helen Rose Domingo, ti mangidadaulo iti Provincial Sports Office a ti panagsagsagana da para iti Palarong Pambansa ket babaen ti napagtitipon a tulong manipod iti nagduduma nga ili ditoy probinsiya.
Daytoy ti inpalgak na kalpasan nga inbatad iti gobierno lokal ditoy ciudad ti Laoag a kalikagom da ti tumulong iti Palarong Pambansa 2025.
Kunana nga iti kalepleppas a Region 1 Athletic Association Meet ket nagballigi babaen ti panagtitinnulong iti Department of Education-Ilocos Norte, Department of Education-Laoag City, Department of Education-Batac City, ken dagiti lokal a gobierno iti nagduduma nga ili ken ciudad ditoy probinsya.
Mamati ni Domingo a babaen ti panagtitinnulong dagiti maseknan ket agballigin to manen ti probinsya iti panag-host na iti Palarong Pambansa inton 2025 kangrunaan na ket a manamnama nga adda iti nasurok a 170,000 nga atleta, coaches ken technical officials ti makipagpaset.
Inpakaammo pay ni Domingo nga addan dagiti naawat da a surat manipod kadagiti local chief executive iti nagduduma nga ili no sadinno nga indanun da ti panagkalikagom da a tumulong para iti panaghost ti probinsya iti Palarong Pambansa 2025.
