LAOAG CITY – Ma-validate dagiti nagduduma a pagadalan ditoy siudad ti Laoag para iti Cleanest and Greenest Barangay.
Segun ken ni Mr. Hipolito Salva, ti Community Affairs Office ditoy siudad ti Laoag, sumaruno a dumalan iti validation dagiti pagadalan kalpasan nga immun-una dagiti barangay.
Inbatadna a kalikagumda a malpas amin a kasapulan gapu ta maiyuswat ti awarding ceremony-na daytoy inton Pebrero wenno kagiddan iti panagfiesta ditoy siudad ti Laoag.
Mainaig iti daytoy, inlawlawagna a dagiti potential winners iti barangay ket dumalan pay iti maikadua a validation tapno masigurado no dagitoy ket itultuloyda met laeng ti panagdalus ken pannakapapintas iti barangayda.
Naammoan a ti maideklarar a mangabak wenno ti 1st runner up ket umawat ti 75 a ribu a pisos, 2nd runner ket 50 a ribu a pisos ken 3rd runner up ket 30 a ribu a pisos iti urban ken rural category.
Malaksid iti daytoy, adda pay ti special award a Best in Material Recovery Facility nga umawat met ti 25 a ribu a pisos.
