LAOAG CITY- Impakaammo ni Dr. Norma Lorenzo-Fernando, ti mangidadaulo ti Office of the Senior Citizen Affairs a naipaay ti nagduduma a serbisio para kadagiti Senior citizens ditoy siudad ti Laoag a kas paset ti selebrasion ti Elderly Filipino Week Celebration
Segun kenkuana, immunan a naipaay ti serbisio medical a pakairamanan ti eye check up ken libre a pukis ken masahe.
Inbatadna nga adda 5 a wheelchair ken 15 a sarukod a nabunong manipud ti Department of Health (DOH) ken pakairamanan pay ti pannakaipaay ti 50 a sako a bagas.
Gapu iti daytoy, nagyaman ni Fernando ti balligi a pannakaisayangkat ti selebrasion ti elderly week iti babaen ti panagbibinnulig ti City Government of Laoag, City Social Welfare and Development (CSWDO), City Health Office (CHO), Integrated Philippine Association of Optometrist Ilocos Norte Chapter, Mabuhay Desseret Foundation, ken dadduma pay.
Innayonna a napateg nga itultuloy nga ipaayan ti importansia dagiti nataengan iti babaen ti daytoy a programa.
Kabayatanna, impanamnamana ti agtultuloy a panangkitada ti wagas tapno mangpataod ti nagduduma a programa para ii pagsayaatan dagiti Senior citizen ditoy siudad ti Laoag.
